FORT ROTTERDAM! I'm Coming... (masih 100% Bahasa Manado)

Pas-pas kita masih ada di Makassar jadi kase puas mo ba baron ni Makassar. Jadilah kita deng ajus pigi bajalang keliling Makassar, karna Charles (kita pe kaka) ada tugas ka luar kota, jadi nda ada guide mo kase tunjung jalang. Kita deng ajus sepakat mo pigi ka Fort Rotterdam, mar depe masalah torang dua nintau depe jalang, jadi torang nekat bajalang nae motor ka Fort Rotterdam (yang nintau ada di bagian mana) hanya dengan panduan Google Maps (baru pertama kali coba tambah lei kita da foto nda sampe Fort Rotterdam) sambil memegang teguh semboyan “malu bertanya sesat dijalan” (pertama kita kira mo manjur).

Ini dia Google Maps ke FORT ROTTERDAM

Akhirnya torang sampe juga di Fort Rotterdam biarleh so brapa kali ilang jalang dan coba-coba tanya orang, yang depe laste torang sewa becak di dekat Makassar Trade Center for jadi guide ka Fort Rotterdam dengan upah 15 ribu perak. Samua rasa saki hati, siksa,sedih, dilema, lelah, galau (doh so talalu lebay komang ini) boleh ta bayar lunas deng ni Benteng Belanda pe kemasyuran.

Karna ada sementara kase bagus for pameran, jadi banya bahan bangunan yang tafiaro. Di depe halaman muka sebelum mo maso ka Fort Rotterdam ada patong Sultan Hasanuddin nae kuda (kurang tau lei kita tu kuda laki-laki ato parampuan, kage lei bencong).

Ajus deng Sultan Hasanuddin

Kayak Tugu Selamat Datang

Depe pintu maso Fort Rotterdam dari kayu besi kong da bout-bout, yang pasti khas skali Belanda karna amper samua depe fondasi pake besi deng bout sama deng bangunan-bangunan Belanda di Manado, kalo nda salah SMP DON BOSCO SD DON BOSCO yang dulu (sebelum renovasi) depe fondasi model bagitu.

Ajus di Muka pintu masuk

Di dalam benteng lei ada depe museum yang dikelola pemerintah. Di situ dorang kase tunjung depe bahan-bahan bangunan benteng, keris deng senjata orang Makassar, alat-alat berburu dari zaman pakahia, deng doi-doi yang dari zaman penjajahan, sampe miniatur Candi Borobudur deng Candi Prambanan, oh iyo deng guci-guci Cina lei ada. 

Batu Tela dari Fort Rotterdam

Macam-macam Lante di Fort Rotterdam

Aneka genteng Fort Rotterdam (Multiroof nda ada)

Ni benteng lei lengkap deng Gereja, mar sekarang so dicagarkan jadi so nda dipake for tampa ibadah. Samua bangunan dorang ada cet baru mar tetap depe cet pe warna kata sama deng depe warna pertama, jadi depe nuansa jadul masih dapa rasa.

Mar inga, jang brani ngoni kore tu tampa-tampa ujung, karna itu so di booking oleh pasangan muda yang lagi kasmaran. Sialnya, yang selalu ada di tampa bersejarah laeng pasti ada orang-orang katro yang suka terkenal deng ba-piloks dorang pe nama di tembok-tembok. Tapi di atas itu samua ini tetap jadi pengalaman yang asik.

***

Oh iyo ada ley carita waktu kita ada dapa foto waktu abis ba fotocopy, trus kita kase pa tu mbak penjaga fotocopy situ karna kita pikir pasti tu orang mo cari ka situ.

“Mbak ini (kita kase tu foto), ada foto jatuh”, kita bilang

“oh bukan punyaku ji”, kata Mbak

“mungkin punya orang yang tadi fotocopy di sini, mbak. Tadi jatuh di situ(kita tunjung tu tampa kita da punggu tu foto)”, kita bilang

“oh kita yang dapat ji?”, kata si Mbak

“kita yang dapa mbak!”, kita balas

“Iya, kita yang dapat toh!”, balas si Mbak

“iyo, mbak jo dang yang dapa(so pastiu mo baku ambe)”, kita balas.

Sampe di rumah kita carita samua pa kita pe ajus, kong baru kita tau klo di Makassar kata “kita”= kamu, laeng skali depe arti deng di Manado. Ternyata kita so salah kaprah pa tu Mbak.
Hehehe…

Kalo ada pengalaman ke Fort Rotterdam dan pengalaman unik laeng karna beda arti bahasa silahkan di komen yah….

1001 cerita dari Makassar, 100 % bahasa Manado

Pas ni libur Semester, kita deng lilis (kita pe anak basodara) pigi ka Makassar for mo ba pasiar. Jadi torang berangkat noh pas hari Minggu kemaren ka Makassar nae pasawat Lion Air, jujur ini pertama kali kita nae pesawat karna klo kita pikir misalnya ada masalah di pesawat kong jatung sudah so nimbole mo bekeng apa-apa, beda deng klo misalnya torang nae kapal kalo misalnya ada masalah boleh mo berenang ato nda paling kurang ada pelampung toh!.(mar kita ley blum pernah nae kapal)

Waktu maso di pesawat doh kita pe pikiran so malayang so bapikir sagala macam cilaka pesawat, paling bekeng tako waktu tainga tu Adam Air noh. Gugup minta ampun sama deng waktu hari pertama UAN SMA, kong blum blajar tambah ley nda ada kunci di tangan, memang sama deng cari mati. Trus, kita bongkar-bongkar di tampa dudu ada tu buku doa, nyanda hitong tiga kita langsung berdoa, inga Tuhan kalo waktu tako. Ckckckck...

Landing di Makassar ni lilis pe barang pake tailang lei dari bagasi, langsung torang pi komplain pa Lion Air, nya lama tu om datang kong bawa lilis pe koper, dorang bilang kata tu koper orang da kase pulang.

So klar tu dia langsung torang pigi pa Charles (kita pe kaka) pe kos, taro barang kong langsung pasiar-pasiar. Pertama torang pigi ka Makassar Trade Center (kalo di Manado, Manado Trade Center) depe isi pe padat skali deng orang, sampe siksa mo bajalang. Torang isi puru dulu di depe foodcourt, sampe tunggu sore karna Charles bilang depe sunset di Pantai Losari kata bagus.

Hari sudah sore dan kami pun langsung menuju ke Pantai Losari (Lha… kapa depe bahasa so bagus?) pas so sore torang langsung pigi ka Pantai Losari sampe di sana sama deng biasa klo orang mangkage yaitu mengabadikan suasana dengan foto.

Pamtai Losari

Satu hal yang patut di akui dari Pantai Losari adalah depe panorama karna keindahannya mampu membuat anda terpesona.

So puas cuci mata langsung torang ka Trans Studio, sebenarnya ini kita pe tujuan utama ka Makassar. Sampe di Trans Studio, oh tuhiiilll bukang maing dang depe pai, kalah jao stow Mantos deng Mall, mar klo Megamas kase gabung boleh stow mo dapa. Masih di Trans Studio pe mall kita so sama deng kurcaci da maso rumah raksasa, kita lia tu langit-langit pe tinggi dang bukang maen, sampe kita rasa tu orang Makassar da lia pa kita pe dalam hati “keode, orang kampung dari mana lei ini?”. Pusing amat, amat saja tidak pusing… hehheehe…

Pintu Masuk TRANS STUDIO

Maso di Trans Studio pe tampa bermain kita langsung ta inga Ancol (cuman lia dari TV katu ya…). Bli tiket masuk kong langsung cari depe wahana, beuh pertama kita lia bianglala deng bom-bom car. Dalam hati “wangala dang, ade-ade punya ini” langsung torang tanya pa depe penjaga

“Mas, kalo wahana yang menantang dimana ya?” (kage pake bahasa Manado kong dorang nda mangarti ley)

Mas jawab “oh.. disana dek, di Magic Corner”

dia pangge ade kata noh, sejak kapan torang jadi kaka dede?(Buset ababil skali dang) Deng dia nda lia stow ni kumis so sama deng om Opik SM#SH pe kumis. Ckckkckc….

Pas baru mo maso Magic Corner, eh… baku dapa deng abang Michael Jackson(kalo MJ komang so baku kaka dede) deng om Charlie Chaplin. Langsung noh torang minta foto bareng.

Mr. Charlie, Lilis, MJ, deng kita

Suer waktu da ambe ni foto dorang bilang kita mirip deng Michael Jackson, semoga saja kita boleh mo jadi kaya sama deng dia. hehehe…

Yak, langsung deh torang maso ka Magic Corner, pas pe maso dapa lia roller coaster mini sementara beraksi. Pe coba kamari, WOOUUUWWW rasa-rasa mo talempar sampe bekeng kita jadi gagap gara-gara depe dua ronde.

Lilis dan Charles, gue dan om-om

Pe bale kita pe jiwa yang malayang sama deng pante malalayang (nda nyambung) langsung torang coba Dunia Lain, depe pertama maso bekeng tako, so pe galap kong tambah ley di plasma ada tu om botak yang jaga bawa acara Masih Dunia Lain, OH GOD PLEASE HELP ME!!. Di situ ley ada tu orang rupa pencabut nyawa, memang tu dia so bekeng spot jantong, kita pe dalam hati “Les…Lesss… soe apa kita kong musti dengar pa ngana maso ka sini”, langsung nae pa depe kreta kong tour di Dunia Lain dimulai. Depe pintu tabuka oh tuhil mo muncul apa ini kang?, nintau kote nya talalu bekeng tako karna depe isi cuman patong kunti, tuyul, pocong, genderuwo, deng setan lainnya, pokoknya nda ada tu orang jaga bapake setang, yang bekeng tako kwa cuman depe efek suara. Ckckckck… mengecewakan… (Padahal kita pe sanang nyanda dua).

Abis itu torang coba Dragon Casttle, di situ torang dapa pantul ka atas ka bawah sama deng tu orang bogo-bogo, sama deng tu alat jaga buka ban dalam oto depe babunyi. mar memang asik skali noh soalnya pe capat kong dapa rasa rupa balompa dari gedung yang sangat tinggi sekalianan tinggi.

Kumbang di tengah Kupu-kupu

Pas sementara istirahat kita dapa lia dua kupu-kupu cantik sementara beraksi, langsung minta foto bareng satu kali for mo ba-cars energi. hehehe...

Abis ba foto torang lanjut bajalang baputar Trans Studio, karna cuman sadiki tu wahana yang menantang jadi cuman sadiki yang torang coba, oh iyo tambah ley kote tu wahana yang dari Indiana Jones, torang nae paraho, yang pasti di atas aer kong baputar-putar di situ sampe depe akhir tu paraho mo baluncur, deng itu pasti mo bekeng ngoni pe baju basah.

Kapal ke Alam Baka

So puas deng trans studio torang cari makang di dekat Pantai Losari. Kong ada tu mba mengong yang rupa pandang enteng skali.

mbak-mbak, “mau pesan apa mas?”

kita,”es pallubutung-nya mbak satu.”

mbak-mbak,”mas tau es pallubutung, ini es pake santan, pisang, dan kelapa.”

kita,”oh gitu toh mbak, kupikir martil ama kepala buntung pake es. Ya udah itu ajah deh mbak.”

memang katu kalo mo lia kita pe gaya sama deng tu orang dari utang. Hehehe...