Akhirnya UTS (Ujian Tengah Semester) selesai, banyak hikmat yang bisa di petik dari ni UTS, salah satunya fakta kalo kita nda pernah belajar. Ini bukang depe pertama kita nda belajar pas ujian deng yang pasti bukang for terakhir lei noh. Halalkan segala cara untuk mencapai kesuksesan itu pepatah yang pas for kita pe cara jitu sukses pas ujian. Ini kita pe jurus pamungkas pas ujian, yang kita bagi dalam 3 tahap :
1. SEBELUM UJIAN
· Bekeng catatan kecil, pertama ini dia kita cuman jaga pake belajar, mar nanti pas ujian boleh jadi senjata pamungkas yang menjamin kelulusan.
· Duduk dekat orang pande, ada pepatah yang terkenal di skolah posisi menentukan prestasi, kalo misalnya so nintau mo jawab apa orang pande inilah yang menjadi senjata pamungkas selanjutnya. Mar kita tetap nimau ilang wibawa jadi kalo misalnya tu orang nyanda talalu kita kanal, kita jaga pura-pura ba tanya sadiki mar kalo tamang dekat kita jaga bage tre-tre.
2. SELAMA UJIAN
· Pake tu mata bae-bae, ini jurus supaya kita tetap dapa lia pande di klas. Kalo kita cuman jaga pake ni jurus for pengawas ujian deng for tamang pe lembar jawaban. Kalo ngoni memang so kuasai butul, ngoni boleh liat pengawas dari bintik buta mata.
· Pura-pura bapikir, kita tetap nimau kase tunjung kalo kita nda blajar sama skali (biar lei memang). Jadi selama ujian kita jaga pura-pura bapikir, kalo perlu sampe jaga bacarita sandiri biar yang kita ada bilang cuman lirik lagu ampas kalapa, tetaaap majuuu banteeeng!
· Buka buku, sebenarnya ini jurus terlarang, mar demi nilai jang pernah stengah-stengah, Io toh? Jurus ini mampu melatih torang pe kreatifitas, misalnya bagemana cara torang boleh lolos dari masalah yang susah? Ato cara mo bekeng sesuatu tanpa orang laeng tau?
3. SESUDAH UJIAN
· Ikut mayoritas, biasanya abis ujian pasti so bekeng kelompok-kelompok. Orang-orang yang ada blajar pasti mo bahas tu ujian tadi sedangkan yang nyanda mo cari cara kase bersih pikiran. Bakumpul dengan tu yang paling banya, mar biasanya kita jaga bakumpul deng orang yang ada blajar biar kita sandiri nyanda blajar. Cari muka supaya di ujian brikut kita masih diperhitungkan.
· Refreshing, kebiasaan lama pasti susah ditinggalkan. Maen bola adalah tujuan utama, lalu badminton, kemudian playstation. Ini dia boleh bantu kase ilang stress pas ujian deng supaya boleh fit for ujian brikut. Ini jaga bekeng sama-sama deng orang yang nda jaga belajar.
Semoga tips dan trik di atas bisa berguna, kalo ada yang mo tambah boleh stow mo ba komen di bawah sini. OK…. 
