Minggu ini adalah minggu paling sibuk yang pernah kita rasa, sekaligus minggu paling bekeng saki kapala. Syukur jo tu urusan kampus yang 'minta ampun' boleh cepat selesai, memang itu tu yang paling bekeng saki kapala.
Dari masalah administrasi yang nda jelas deng nyanda ada kepastian sampe maen "pak-pak sambunyi" deng dosen demi sebuah tanda tangan. Waktu semester lalu lei stengah mati jaga cari tanda-tangan dosen pembimbing, syukur-syukur kalo dia jaga datang ka kampus, mar kalo dia cuman di rumah noh ngana rasa akang jo tu dia, apalagi kalo dia suka pasiar-pasiar odoo..ddooo...ehhh... minta ampung tu saki kapala.
Tambah lei ni hape nokiyem so ba error, memang gila kwa. Padahal so di situ tu dosen pe nomor. Segala cara so kita bekeng supaya ni hape boleh mo bagus, dari baca jampi-jampi sampe bersemedi 3 hari di gua nya si buta. Hasilnya, nihil. Dia hanya kaluar suara tanpa gambar.
Setelah pasrah pada keadaan. Satu minggu kemudian nintau ada angin apa ni hape jadi ulang, depe wallpaper kita pe muka yang unyu-unyu so muncul. Mar ini cuman bertahan 1 jam. Selidik-menyelidik ternyata ni hape sebelumnya ada cewe pegang, jadi kita mulai coba telusuri. Setiap ni hape babunyi kita langsung kase cewe pegang. Alhasil lima menit kemudian hape langsung menyala. Dapa lia ni hape pe jenis kelamin laki-laki noh. Soalnya dia cuman suka pa cewe-cewe, apalagi kalo cewe pasung, tambah lama lei depe masa hidop. memang sadiss ni hape.
